गांेसा म्ह सिमट के रहगी

भैंस का चौथ गाय की थेपडी म्हं चिपट कै रहगी
मेरी लुगाई की जिंदगी गोसां म्हं सिमट के रहगी

पांच बजे उठदी ए चाली, गोबर कानी चालै सै
सारा ठाण भार कै, फेर तासले म्हं घालै सै
हाथां की लकीरां म्हं उसके गोबर लिपट के रहगी
मेरी लुगाई की जिंदगी गोसां म्हं सिमट के रहगी

छोटी थेपडी, बडा गोसा, इन्नै का जिकरा राखै सै
कोण सी भैंस मारै चैथ, हरदम ठाण कानी झाकै सै
पक्का फर्श नहीं करण देंदी वा खांचे म्हं रिपट के रहगी
मेरी लुगाई की जिंदगी गोसां म्हं सिमट के रहगी

रोज बेरण खेत म्हं जाकै, जई, बाजरी बरसम लावै सै
फेर चाली कहके हांसे, इब तो पतला गोबर आवै से
हर किते जिकर चलावै से सबेरे नलके उपर फहगी
मेरी लुगाई की जिंदगी गोसां म्हं सिमट के रहगी

दौ सौ गज का प्लाट म्हं, गोसे नहीं सै थोडे
तारी भाभी नै भाईयो ला राखै सै दस बिटोडे
यो संदीप तन्नै समझावै सै, बोली क्यातैं तु रै बहगी
मेरी लुगाई की जिंदगी गोसां म्हं सिमट के रहगी

तारी भाभी का दिल रोज खटाई मांगै सै

संदीप कंवल भुरटाणियां

उसकै खाणा पीणे नै मार दिया यारो
तारी भाभी का दिल रोज खटाई मांगै सै

ज्यूं-ज्यूं दिन टपदा जावै सै यारौ
समोसे, बरगर, पैटीज की रटाई मांगैं सै

कित लाउं रोज मैं ताजा ब्यावडी भैंस
बैरण हर टेम खीश अर मलाई मांगैं सै

घणा दुखी कर दिया सूं उसने यारो मैं
वा रोज नए-नए हलवाई मांगैं सै

फूल के पेठा सी होगी भाईयो वा चाली
उसका गात घणी कसूती कूटाई मांगै सै

न्यूं लुगाई तै डरकै के जीणा सै कंवल
संदीप का दिल तो बाबा आली चटाई मांगैं सै

भाईयो या कविता सै डा. अजय सिंह चौटाला जी पै, उनकै जन्म दिवस पर संदीप कंवल भुरटाणियां नै कै लिख्या सै, थौडा गौर करियो, अर कोंमेंट करियो

हरियाणा की जनता का रूखाला
जन्मदिवस मुबारक हो भाई अजय सिंह चौटाला

... चौटाला गामै म्हं जामा था
ताउ देवीलाल का जमाना था
चै. ओमप्रकाश घणा स्याणा था
खुवाया कसूता एंडी खाणा था
दातारामगढ. सीट तै पाडा कसूता चाला
जन्मदिवस मुबारक हो भाई अजय सिंह चौटाला

कुरूक्षे़़त्र यूनी. तै आपनै बी ए करी
एम ए पब्लिक एड भरी
लाॅ राजस्थान तै करकै आया
डाक्टर की उपाधि ल्याया
जनता की बंद किस्मत का तू ए सै ताला
जन्मदिवस मुबारक हो भाई अजय सिंह चौटाला

पहली बार 1980 म्हं राजनीति म्हं आया
1989 म्हं दातारामगढ तै जीता पाया
1993 म्हं नोहर तै इलैक्शन लडाया था
भाई अजय सिंह नै परचम लहराया था
जनता का नेता सै भाईयो खूब देख्या भाला
जन्मदिवस मुबारक हो भाई अजय सिंह चौटाला

भिवानी लोकसभा 1999 म्हं करी ब्होत खिंचाई थी
सारे जणा नै पछाड कै रिकार्ड जीत पाई थी
इब डबवाली इलैक्शन छवि कसूत बणाई थी
के वी सिंह 12000 बोटां तै धूल चटाई थी
साफ सुथरी छवि का नेता ना सै दिल का काला
जन्मदिवस मुबारक हो भाई अजय सिंह चौटाला

बुरे टेम पै भी अजय सिंह कदे नहीं घबराया
ओ ताउ देवीलाल तेरा पोता सारे जग म्हं छाया
इंडियन नेशनल लोकदल की कमान संभाल राखी सै
संदीप कंवल भुरटाणे पक्का आपका साथी सै
50 सामण देख लिए तन्नै इब 51 का पाला
जन्मदिवस मुबारक हो भाई अजय सिंह चौटाला